Slik jobbar me med openheit i nemndene

Me sørgjer for at all relevant informasjon om prosessane og avgjerdene våre er lett tilgjengeleg for dei som er ramma og for offentlegheita. Me legg ut ca. 20 % av alle vedtak som fattast i nemndene på Lovdata. På nettsidene våre, finn du retningslinjer og rettleiarar for saksbehandlinga, og dessutan nyttig informasjon om til dømes saksgang, og sakstypar og barns medverknad og vanlege spørsmål for deg som skal møta i nemnda.

Me rapporterer regelmessig om verksemda vår og resultata våre. Dette inkluderer publisering av årsrapportar og andre relevante dokument som gir innsikt i arbeidet vårt og prioriteringane våre. Me publiserer også statistikk til mellom anna forskingsprosjekt, analysar og media. Me samarbeider med Barne-, ungdoms- og familiedirektoratet (Bufdir) om publisering av statistikk som omhandlar tvangsvedtak etter barnevernslova.

I november 2024 hadde me eit internt fagmøte om openheit og innsyn i nemndene. Korleis kan omsynet til offentlegheit tilpassast personvernet til barn og foreldre? Tilrådingane i den nye rettleiaren vår vart presentert, og me fekk høyra viktige perspektiv frå Ingunn Røren og Anne Marte Moland i Aftenposten, Gloria og Mathea i Forandringsfabrikken, og Vidar Strømme i NIM - Noregs institusjon for menneskerettar. Her kan du lesa rettleiaren vår for nemndleiarar.

I januar 2025 hadde me gjennomføra Open Dag i alle nemnder rundt om i landet. Med ønske om meir openheit rundt det viktige samfunnsoppdraget vårt, vart lokale politikarar, lokal media, og f. eks kommunal barnevernsteneste, fagkunnig og sakkunnig med fleire inviterte til oss. Me opna dørene til lokala våre, som på grunn av teieplikt normalt er stengde for offentlegheit og presse. Me ønskjer å gi eit innblikk i saksbehandlinga vår og problemstillingar som nemnda må ta stilling til. Me viste filmar om våre saksbehandlingsformer, gav ei omvisning i lokala våre og høyrde interessante innlegg frå Marit Skivenes, Stine Sofies Stiftelse og Barneombodet.

I januar 2026 arrangerte vi årets Openheitsseminar i Oslo – ein fagdag som skal styrkje innsynet i arbeidet vårt og bidra til større forståing for korleis vi ivaretek rettstryggleiken til barn og familiar. Årets program tok for seg sentrale tema i barnevernsfeltet, mellom anna barns deltaking i eiga sak, bruk av tvang og makt, og situasjonar der barn står i alvorleg risiko. Gjennom innlegg frå nemndleiarar, fagpersonar og Barneombodet fekk deltakarane innsikt i både utviklingstrekk, utfordringar og praksiserfaringar. Seminaret gav òg eit innblikk i kvardagen ved Yttrabekken barnevernsinstitusjon, som arbeider tett på ungdom med omfattande behov. Barne- og familieminister Lene Vågsild avslutta dagen med å peike på vegen vidare for barnevernsfeltet, og løfta fram kor viktig tillit, kvalitet og barns medverknad er.

Vi arrangerer ein årleg konferanse i Bergen, der målet er å styrkje kompetansen i feltet og skape rom for fagleg diskusjon og refleksjon. Konferansen samlar fagpersonar frå heile landet og fungerer som ei viktig møteplass for kunnskapsdeling, erfaringsutveksling og inspirasjon.

Gjennom innlegg frå leiande fagfolk, forskarar og praktikare får deltakarane innsikt i aktuelle utviklingstrekk, nye perspektiv og relevante problemstillingar. I tillegg legg konferansen til rette for gode samtalar og erfaringsdeling mellom kollegaer som møter dei same utfordringane i kvardagen.

Vi ønskjer at alle som deltek skal oppleve fagleg påfyll, bli inspirerte til vidare godt arbeid og få med seg konkrete verktøy og nye refleksjonar tilbake til eiga verksemd. Les meir om konferansene her.

Kampanjen På innsida av nemnda, som vi lanserte på sosiale medium hausten 2025, er utvikla for å styrkje openheit, innsyn og forståing for arbeidet vårt. Mange kjenner til barneverns- og sosialfaglege saker gjennom media, men få veit korleis nemndene faktisk arbeider – kven vi er, korleis ei sak blir behandla og kva prinsipp som ligg til grunn for avgjerdene våre. Den første delen av kampanjen gir difor eit tydeleg og lett tilgjengeleg bilete av saksgangen, rollene og arbeidsmetodane våre. Når publikum får forklart kva vi gjer og korleis vurderingane blir gjorde, bidreg det til større føreseielegheit, mindre uro og meir tillit til prosessane våre.
I den andre delen av kampanjen vender vi merksemda mot samtaleprosess – ei arbeidsform mange har høyrt om, men som få utanfor fagfeltet kjenner godt. Ved å forklare korleis vi snakkar med barn, foreldre og fagpersonar, kvifor dialogen er så viktig, og korleis samtaleprosessen kan skape betre forståing og løysingar i sakene, gir vi offentlegheita betre innsikt i eitt av dei mest sentrale verktøya våre.
Ved å vise fram både kven vi er og korleis vi jobbar, ønskjer vi at kampanjen skal byggje tillit, redusere avstanden mellom oss og publikum og bidra til ein meir opplyst offentleg samtale om nemndenes rolle og ansvar. Dette er ein del av vårt kontinuerlege arbeid for å vere eit ope, tilgjengeleg og trygt organ for barn, familiar og samarbeidspartnarar.

Sjå videoane her. 

Tillit er essensielt for å skapa gode prosessar og legitime avgjerder. Me oppnår dette gjennom dialog og kommunikasjon som inviterer til tillit, både internt i nemnda og eksternt med dei me tener. Tillit gir behandlinga og avgjerdene våre legitimitet og forsvarlegheit.
Openheit betyr for oss å vera opne og tilgjengelege utetter på dei områda der me kan vera det, som prosessane våre og måten me jobbar på. Me trur på å kunna ta opp vanskelege saker og tema internt utan frykt for konsekvensar. Dette forhindrar uønskte hendingar og tilsløring av kritikkverdige forhold. Openheit er også nært knytt til tillit, då det skaper ein transparent og forståeleg prosess for alle involverte partar.
Respekt inneber å visa høflegheit og empati for alle aktørar og partar i ei sak. Me anerkjenner forskjellighet og mangfald, og viser omsorg og aksept for arbeidet til andre. Respekt betyr også lojalitet overfor avgjerder og oppdrag, noko som styrkjer samarbeidet og forståinga mellom alle involverte.
Les meir om visjonen vår her.